سماعات في السقف وبرجكتر .. ما هي طريقة التنفيذ ؟

[زهرة الآس]

السلام عليكم ورحمة الله وبركاته
في البداية أشكر القائمين على هذا الموقع الرائع والذي يعد من أفضل المواقع في مجال الهندسة المعمارية
وأسأل الله تعالى أن يبارك فيهم وأن يجعل ما يقومون به في ميزان حسناتهم
فحقاً خير الناس أنفعهم للناس
أدخل في موضوعي نحن انتهينا من العظم وفي مرحلة ما قبل اللياسه وعندي كان فكرتين أريد تنفيذها في فلتنا وهي :

الفكرة الأولى :

أبغى يكون في كل غرفه وحتى في المطبخ والصالة سماعه في السقف ويكون هناك وحدة التحكم احددها في أحد الجدران يوضع فيها مسجل مثل مسجلات السيارة وأيضا أزرار التحكم بالسماعات حق كل غرفه
وطبعا الفكرة نفذتها في الدورين للفله يعني كل دور له مسجل منفصل عن الثاني
في البداية واجهتني مشكلة كيف افهم الكهربائي بلي ابغاه وطبعا لما فهم قال هذا شغل إضافي واخذ عليه مبلغ وطبعا قلت مش مهم بنعطيك إلي تبي بس نفذ لي الفكرة صح
مشكلتي الآن يا مهندسينا الكرام إني لما رحت أشوف الفله وقبل ما نبدأ تلييس لقيت الكهربائي مجمع الأنابيب هذي البرتقاليه ومغطيها بصفيحه فضيه وأنا ابغاه يسوي لي مثل طبلون الكهرباء علشان اركب فيه مكان المسجل
فالذي أتمناه من مهندسينا أن يشرحوا لي كيف طريقة تنفيذ هالفكره ؟ وبعدين كيف أفهم الكهربائي ؟
وأيضا بعدين لما بجي اركب المسجل أبغى يكون لكل غرفه زر تحكم تشغيل عند المسجل ما ادري الاقي هالشي بالسوق تراني ما عندي أي فكره ولا خبره بهالسوالف
طبعا أتوقع البعض يستغرب الفكره لأني ما شفت احد سواها من قبل وخصوصا إن إلي حولي الكل علق عليها ويقولون لي مالها داعي
لكن بالنسبة لي أرى إن لها داعي وكل واحد يحب يحط في بيته الأشياء إلي يحبها ويترك بصمته على بيته
فمميزاتها هالفكره إنها تفيد كثير في مناسبات الأعياد والحفلات طبعا هذا للدور الأرضي
أما فوق حلو مثلا الصبح تصحي عيالك من النوم على صوت الشيخ ماهر المعيقلي
أو إذا بغت ربة المنزل وهي تشتغل بالبيت تسمع محاضره أو غيره خلال تحركاتها في المنزل وغيره

الفكره الثانيه :

ابي أحط في صالة الدور الأرضي وهي كبيره نوعا ما برجكتر معلق في السقف ويكون هالبرجكتر ممكن ينشبك عليه الرسيفر أو الديفيدي بحيث اسوي مثل السينما المنزليه وأيضا ينشبك فيه اللابتوب
أتمنى من مهندسينا شرح تنفيذ هالفكره ؟ وهل اقدر اخلي السماعات الموجوده في الصاله تشتغل عن طريق المسجل وفي نفس الوقت تشتغل مع البرجكتر ؟
وجزاكم الله خير

[زهرة الآس]

لا ادري هل طلبي لا يناسب مكان استشارات هندسيه ( العماره والديكور ) لأنه نوعا ما عن اجهزه ؟
اتمنى اذا اي احد عنده فكره عن الموضوع ويقدر يفيدني بشيء يساعدني

ولكم جزيل الشكر

[الريحانة]

الفكرة حلوووووووووووة ...وانا بعد اتمنى انفذها في فيلتي المستقبلية

انا كنت افكر بسماعات في كل البيت في المجالس وحتى خارجية ممكن اتحكم فيها واحاول اربط فيها برنامج الاذان

عشان يكون الاذان واصل لكل الغرف وممكن بعد نفس ماقالت اختى حق الاحتفالات


ياريت حد يرد على الاستفسارات ....

واعتقد اختى يبيلج مهندس صوت مش كهربائي هو الى يعرف حق مثل هالامووووووور

[زهرة الآس]

تسلمي اختي الريحانه رفعتي معنوياتي على الفكره

واتمنى من المهندسين او الي عندهم خبره في هالمجال يفيدونا

[خالد فارس]

السلام عليكم
طبعآ عن نفسي تعاقدت مع شركة خاصة لتركيب سماعات في عدة نقاط في المنزل مع مشغل cd ,dvd ,وmp3ومن خلال هذا الجهاز استطيع تشغيل اي مادة وبثها على جميع الغرف ..من المسجل او الحاسوب ... وكذلك قمت بوضع وحدات تحكم في الطابق الأرضي والعلوي وطبعآ الأسعار تبدء من 3000 ريال الى 15000 على حسب عدد السمعات ووحدات التحكم ونوع المنتج ومميزاته

[زهرة الآس]

شي جميل الأخ خالد الفارس ان توجد شركات تسوي كذا

طيب في موجود بالشرقيه

اذا ممكن تساعدني باسم الشركه ورقمها

[جيم بوي]

انا خلصت عظم أقدر اسوي هذا النظام ولا راحت علي ؟

[خالد فارس]

و الله يا أختي زهرة الآست كان بودي بس ما يحضرني مكان في الشرقية تجدين ان شاء الله هاذي الأنظمة تباع عند نفس الشركات التي تركب الأنظمة الأمنية للمنازل

[خالد فارس]

المشاركة الأصلية كتبت بواسطة جيم بوي

انا خلصت عظم أقدر اسوي هذا النظام ولا راحت علي ؟

تقدر تسوي ما فيه اي مشكلة ما دام انت لسه بمرحلة العظم

[خالد فارس]

هذا موقع بالسعودية يتعامل بهذه الأنظمة ورقم هاتفهم موجود بالموقع أتمنى ان يفيدك
http://www.emadtel*****/sound.asp
لا تنسونا من خالص دعائكم