[كليك10]

أشكر كل من شكرني على المعلومات >>>>>> وبصراحة أشوف ان هذا من واجبي من باب أحب لأخيك/أختك ماتحب لنفسك........ هذا اولاً, ثانيا: ومن باب رد الجميل لأعضاء المنتدى وبالذات أخت الجميع دوسرية والتى أستفدت كثيراً من مواضيعها في إختيارات كثيرة بالنسبة للبيت....... أقول هذا جزء بسيط من رد الجميل.
نرجع لمحور حديثنا, بالنسبه لي انا سافرت أبحث عن الجودة وتعدد الإختيارات ولم يكن التوفير هدفي ابدا ولكن مع هذا والحمدلله إجتمعت كل هذه الأمور .
بالنسبة للفنادق كثيرة في جوانزوا وأسعارها مناسبة جداً مقارنة بأسعار الفنادق في أي مكان في العالم..... أخذنا اول 3 أيام في فندق 5 نجوم بعيد شويه عن وسط المدينة وكان سعرة 50 دولار (يابلاش) وبعدين نقلنا شقق فندقيه قريبة وكذلك 5 نجوم ب 100 دولار. السكن في جوانزو أشوف انه خيار مناسب بل الأنسب لوجود المطاعم العربية وأماكن التسوق الكثيرة ولأن الشخص مابيكون كل وقته مطارد وراء محلات السيراميك وادوات البناء, بالعكس اشوف انه مادام راح هناك فلازم يتمشى في الديرة ويتسوق ويفلها. هوليدي إن, كراون بلازا وجاردن كلها فنادق راقية وموقعها ممتاز وقريب من المطاعم العربية والبقالة التي تبيع منتجات حلال ولكن عيب هذه المنطقة وجود الشحاذين والأفارقة السود الذين يضايقون كل من يظنون انه عربي بعرض بضاعتهم من ****** ودعارة وغيره (بالكلام طبعاً).
بالنسبة للعناوين وهذا مربط الفرس, أقول انا حاولت بكل قوة قبل ما أروح اني آخذ عناوين المحلات الجيده من الأخوان في منتديات مختلفة, وكنت أستغرب من ردودهم وتهربهم (انا فهمتها كذا) من انهم يعطوني عناوين محلات معينة. ولكن بعدما شفت الوضع هناك فهمت ماكانوا يقصدونه في ان المحلات تكون على مد النظر وكل شخص وما يعجبه. المهم هو رؤؤس الأقلام في ان السيراميك والأبواب والمواد الصحية في مدينة فوشان والتي تبعد عن جوانزو حوالي ساعة بالسيارة مع ملاحظة وجود سوق قديم يبيع الرجيع والموديلات القديمة وسوق جديد مظلل و منظم ومحلاته مكيفة وفيه شركات كبيرة للسيراميك والصحية.
كذلك يوجد مول كبير أسمه ( مدينة الصين للسيراميك) وهذا فيه السيراميك الغالي والمواد الصحيه وغيرها لكنه غالي (على قل سنع) , بالنسبة لي أشتريت المواد الصحية من خلاطات وشورات وماشابه من هذا المول لسبب ان الشركات اللي هناك كبيرة وتخاف على سمعتها ولها خبرة في التصدير والتغليف وتعاملهم راقي. ولكن أقولها وأكرررررررها 1000 مرة وبكل صراحة ان الشخص لما يوصل هناك راح ينسى شيء اسمه عناوين والسبب ان المحلات كثثثثثثثييييرة جدا لدرجة انك ممكن بعد كم يوم تتعب من كثر ماتدخل في محل وتطلع منه بالإضافه الى ان الشيء اللي يعجبني ممكن مايعجب غيري ولكن مايمنع ان فيه محلات جيده تعاملت معهم حتى بعد وصولي وأرسلوا لي حاجات إضافية كنت مافكرت أني آخذها الإ بعد مارجعت هنا وحتى بعد وصول البضاعة ولايزال التواصل موجود.
بالنسبة لمدينة الإنارة جونشان تبعد حوالي ساعتين من جوانزو , رحت لها وتجولت فيه لمدة نصف يوم وماعجبني شيء ربما لانه كان 50% من المحلات مقفله بسبب راس السنة ورجعت وإشتريت الإنارة من جوانزو.
شيء واحد حبيت أقوله واكرره وهو انه على إفتراض ان الأسعار مقاربه لأسعارنا هنا مع ان هذا مش صحيح ابداً فالمشتري من هناك كسب حاجات كثيرة منها: السياحه والجودة وأكررها الجودة ,وفرة الإختيارات , تعدد الألوان , تعدد المصانع يعني تعدد المنتج, بالإضافة الى التسوق الشخصي قصدي الساعات والشنط تقليد الماركات, الألعاب والهدايا , الملابس وكل مايخطر في بالك.
مثال بسيط أستشهد به:أشتريت ديكور خلفيات التلفزيون والمداخل ويسمونه الحجر الرملي(Sand Stone), اقول أشتريته من هناك , كلفني المتر واصل هنا حوالي 150 ريال تقريباً , نفس النوع (قص , لصق) موجود عند الموسى في مخطط 8 وطريق الجبيل-الدمام, سيهات بسعر 430 ريال, وأترك الحكم لكم. وقيس عليها حاجات كثيرة جداً. البلد جميلة جداً والناس في حالها (اذا ماجاء منهم خير مايجي منهم شر) ولا يمكن يضايقونك حتى بالنظر, البلد منظم ونظيف.
ملخص الموضوع أنصح وبقوة بأن يكون الشخص عنده الشجاعةوالعزيمة ولا يسلم دقنه وماله للتجار الطماعين اللي يجبرونك على انك تختار على ذوقهم من المنتجات الرديئه اللي يستوردوها وبالأسعار اللي هم يحددونها. أصعب ما في الموضوع هو الجهد الذهني في الإختيار والجهد البدني في البحث في المحلات وهذا بيحصل حتى لو الشخص بيشتري من بلده يبقى الفرق في موضوع السفر ونقول يقابله السياحه والمشتريات الشخصية اللي ذكرتها. وين يجي الفرق؟ الفرق في الجودة اللي انت اخترتها والتوفير الكبير اللي ممكن تشتري به شيء ثاني في البيت وشيء ثاني هو التميز في بضاعتك اللي ماراح تلاقيها في كل البيوت تقريبا بحكم ان كل الناس في مدينتك يشترون من نفس المحلات.

بالنسبة للأثاث , مع ان زميلي اللي كان معاي أشترى الأثاث إلا ان معلوماتي بسيطة بحكم اني كنت مشغول في مواد التشطيب ولكن لي عودة ان شاء الله بعد إكتمال البيت لشراء الأثاث.

اي واحد/وحده عنده سؤال لا يرده الا الكيبورد, يسدح سؤاله وان شاء الله اي معلومه او مساعده ماراح ابخل فيها اذا كانت متوفرة لأن الجميل في المناقشه هو تعدد الأسئلة وبكذا تظهر تفاصيل دقيقه تكون غائبة عن ذهن الشخص.