السلام عليكم و رحمة الله و بركاته..
الأخ المهندس/محمد حلواني ...
شاكرة لك مرورك الكريم و تعليقك ... الله يرعاك..
الأخت الرائعة / deniz..
اولا انت لا طفشتيني و لا شب بالعكس يا حلوك و يا حلو اهتمامك اختي الكريمة.. يكفي اني كل ما ناقشت احد في التصميم تزداد قناعاتي في بعض الأمور و تتغير في بعضها..
ارد على استفساراتك واحد واحد..
1.موقع ركن الإفطار..
انا حطيتها على غرب المطبخ و طبعا لو تلاحظين ان جدار المطبخ المطل على الصالة ما فيه و لا فتحة ... لغرض الاستفادة من الجدار بحكم انه في وجه الداخل الى المنزل و يطل على الصالة التي قد تستخدم للضيوف كما ذكرت سابقا .. و علشان كذا ما حبيت انه يكون مكشوف و خليت الفتحة على جنب بحيث ممكن اكبر النافذة اللي موجودة هناك و احط حوض زراعة خارجي و يكون فيه جلسة صغيرة (محندقة) في تلك المنطقة المحصورة بين دورة المياه و المطبخ لمن اراد تناول وجبة خفيفة و خلافه مع ملاحظة :
*ان المكان الرئيسي لطعام العائلة هو في المنطقة المواجهة لمدخل العائلة.
* سيتم تركيب طاولة صغيرة على النافذة المطلة على ركن الإفطار للخدمة..
يمكن هرجي كثير.. اتمنى انه هذه الصورة توضح المقصود..
2. حمام الصالة..
تقولين بعيد.. يمكن معاك حق في هالنقطة .. لكن انا حبيت انه دورات المياه في االمنزل تكون فوق بعض لعدة اسباب منها المادي و منها الهندسي و راح يطول الهرج فيها .. لكن انا عندي نقطة وحدة بعد اذنك.. تقولين الطفل اذا انحصر وين يروح و الحمام بعيد.. معاك حق ..
لكن و الله يا اختي انا الآن في شقة و لك ان تتخيلي المسافات في شقق هذه الأيام .. حبيبتي اذا الطفل انحصر اوبغى يرجع ( الله يعزك و يعز القراء الكرام) و الله ان يسويها و لو بينه و بين الحمام شبر ما عندهم سيطرة هالصغار و هذا اللي قاعد يصير معاي الآن..
3.غرف الملابس..
تقولين غرفة ملابس البنات.. و حمامهم اكبر من غرفة الملابس و حمام الغرفة الرئيسية.. معاك حق 100% تبغين تعرفين ليش انا سويت كذا اقولك..
* حمام البنات انا قسمته قسمين بناءا على اقتراحات الأخوة الأعضاء بحيث يكون 2*2 للحمام و باقي المساحة مغاسل خارجية .
اما بالنسبة لحمام غرفتي .. اعتقد ان حجمه مناسب خاصة اذا عرفتي اني ما راح احط جاكوزي بس بانيو عادي و كرسي واحد و مغسلة ( اعتقد يكفي).
* غرفة الملابس الرئيسية فقط لي و لأبو الشباب
يعني كلها دولاب كبير لي و دولاب صغير له
و تسريحة .. بينما غرفة الملابس للبنات تشمل ملابس( 3بنااااااااااااااات )لحد الآن
يعني عليك الحساب للمساحة اللي راح يحتاجونها ( ملابس+احذية+تسريحة كبيييرة+ جلسة صغيرة ) خاصة اني ناوية احط في الزاوية اللي من بين دورة المياه و النافذة جلسة زي هذي ..
او هذي
ملاحظة / غرفة الملابس الرئيسية صار فيها تغيير بسيط.. تمت ازالة الباب و تحويله الى قوس في وسط الغرفة لأجل امكانية استغلال الزاوية .. و ذلك بعد فتح باب الحمام في الزاوية الجنوبية الشرقية.. كما اقترحوا الأخوة الأعضاء.
4. المممر المذكور ذي المساحة 2.5م .. تقولين انه كبير ..
معاك حق اختي الكريمة .. لكن شسوي اختك ما تحب الممرات و لا تدانيها بعيشة الله( تذكرني بالشقق ) علشان كذا خليته و اسع من اجل اتساع مساحة امتداد البصر .. ممكن احط فيه اي
ديكور يعجبني و يناسب المكان بحيث ما يكون مجرد ممر ..و بعدين اعتقد ان مساحات غرف النوم جدا مناسبة اذا الدعوى (سرير+ طاولة جانبية + مكتب+جلسة صغيرة بجانب النافذة مثل هذه..
5. موقع غرفة النوم الرئيسية..
معاك حق ايضا 100% لكن اقولك ليش..
انا احب اكون قريبة من مدخل الدور الأول( الحين حنا شباب و بعدين الله يعين) .. بعدين علشان نكون مركز مراقبة للطالع و النازل من الدور و له اطلالة على المدخل الرئيسي للعائلة ..( متأثرة بالأفلام البوليسية يمكن)
بس كذا اريح لي قلب و بال .. اما بالنسبة للخصوصية انا ما اشوف فيها مشكلة الا في حالة اذا كنت نايمة بعد الدوام .. او في الإجازات و العيال ( الله يهديهم )مسوين حفلة ازعاج برا( و هذا يصير يوميا) .. الله يعين على تركيب عازل الصوت ..
6. لا تخافين ما بعد وزعت قطع دورات المياه بانتظار رأيك و مشورتك..
رعاك الله ..
