[كليك10]

المشاركة الأصلية كتبت بواسطة غطاريف

أخي كليك 10 شكرا جزيلا على هذا الطرح الذي يضعنا فالصوره والف شكر وشكر لفتحك المجال لنا لازعاجك باسالتنا والله يعينك
الى الان اشتريت أغلب بورسلان البيت اسباني والحمامات اثنين ايطالي واثنين صيني احدهم جوده وممتاز زوالاخر لا وسط وكله من السيراميك الانيق (باقي لي اربع غرف وثلاث حمامات والمطبخ والمواد الكهربائيه والديكورات الجداريه والادوات الصحيه) والاثاث هل بالامكان اذا ذهبت ان انجز هذا كله او صعبه لاني مستحيل ارجع مرتين بحكم انك تعرف المناطق وشكرا

حياك أخوي
والله إذا بتشتري الأثاث مع السيراميك والصحية, أشوف ان المشوار يستاهل بقوة , بس يحتاج لك وقت أطول مش لأن المسافه بعيده, ابداً .... مدينة السيراميك والصحية (فوشان) ومدينة الأثاث (شندا) المسافة بينهم حوالي ربع ساعة او أقل , يعني كأنك تتكلم عن المسافة بين الدمام والخبر.
ليش تحتاج مدة أطول؟ لأنك مابتقدر تغطي الأثاث والسيراميك والصحية في وقت واحد. كل شيء لأزم تخصص له وقت معين. مابتقدر تحدد إختياراتك وانت مقتنع في فترة بسيطة هذا بالنسبة للسيراميك , كل يوم تروح فيه فوشان حتشوف محلات ومصانع انت ماشفتها امس ولا قبله وكل يوم تطمع أكثر ...... تطمع في بضاعة جديدة ومميزة او في سعر معين. هذا يأخذ منك وقت وجهد كبير.
بما ان بيتك أسباني وإيطالي فأنصحك تروح للمصانع لأن عندهم حاجات فخمة جداً وفي نفس الوقت أسعارهم أقل من هنا بكثير ولكن تبقى مشكلة وحده وهي هل بيرضوا يبيعوك كمية قليلة؟ دايما يرفضوا الكميات القليلة (1000 متر تعتبر عندهم كمية قليلة).
لو أفترضنا انك قدرت تحدد إختياراتك وتنهي موضوع الصحية والسيراميك, يبقى عندك الأثاث وهذا الإختيار فيه صعب جداً اولاً لأنه يدخل في صناعته مواد كثيرة والوان متعددة وشركات وجودة مختلفة بعكس السيراميك. الموضوع مش صعب لكن يعتمد على الشخص نفسه .... فيه شخص بيقتنع باي شيء وبيشتري من اول مرة وفي شخص ثاني مايعجبه الا حاجه معينه او مستوى معين وفيه شخص يخاف انه ينضحك عليه فتلاقيه حريص جدا ومتردد ....... وعلى العموم كل البضاعة موجوده , الغالي والرخيص , الرديئ والجيد وكل شخص ومجهوده. اللي ممكن يختصر عليك الوقت لو انت توفقت في مكتب ممتاز يعريف يدير الأمور بخبرة ويعرف يوزع وقتك وعنده خبرة في السيراميك والأثاث, هذا بيختصر عليك المدة بشكل كبير. الكهربائية.... اذا كنت تتكلم عن الإنارة, فهذي ماتأخذ وقت وممكن تشتريها من جوانزو نفسها(غالباً بيكون السكن فيها) أما اذا تبغى تشتري أجهزة كهربائية فوالله ماعندي فكرة عنها أبداً غير اني ضد الفكرة تماماً لأسباب كثيرة منها الضمان وإختلاف المواصفات (التردد Frequancy مثلاً) و أشياء اخرى ولأنها تدخل في صناعتها مواد ومكونات كثيرة يسهل الغش فيها بشكل كبير جداً. فما أنصحك فيها. وتجارب الأخوان اللي كتبوا في هذا المنتدى وغيره تثبت كلامي هذا.
مثل ماقلت الموضوع مش بالصعوبة اللي نتصورها ولكن الوقت مهم جداً ,,,, أقصد المده اللي بتقضيها هناك... لوقلنا 20 يوم أقولك .. نعم كافيه وبيكون حتى عندك وقت تتسوق وتتمشى بس أقل من 15 يوم اشوف انها قليلة وبتزنق نفسك وفي الأخير بتشتري شيء مش اللي في خاطرك او بترجع وانت ندمان انك أخذت بنصيحتي في أنك تروح الصين.