تأسيس شفاط فوق فرن المطبخ واضافة شفاط سقفي ؟!
 

السلام عليكم ،، اسعد الله صباحكم جميعاااااا ،،


اخواني عندي استفسار عن شفاط المطبخ اللي يتركب فوق الفرن ،،


المطبخ عندي مقاساته اربعه في ثلاثه ( ٤*٣ ) وارتفاعه صافي بدون الجبس 3م ومفتوح على الصاله ،،

اشتريت. شفاط kdk سقفي. مقاس 32 [ 32cdh ] للمطبخ عموما ،،


وابغى اركب شفاط فوق الفرن وحاب أأسس له. من الان قبل ابدأ في تركيب الجبس ،، وعندي شوية اسئله

ي ليت تفيدوني فيها ..

اول شي .. كيف طريقة التأسيس لشفاط فوق الفرن ؟ بحيث يكون مثبت على الجدار وطالع الى الجبس ومن فوق

الجبس يطلع على برى ؟!

وثاني شي .. هل اقدر اضيف شفاط سقفي ثاني او اي نوع شفاط ويتركب مع الشفاط اللي فوق الفرن في نفس

الدكت او المسار ؟! وهل بيزيد ف قوته او بيصير صوته مزعج جدا وما ح استفيد منه او انه ما تجي اساسا ؟!!


ثالث شي ،، ايش افضل ماركات الشفاطات هذي واقواهم ؟! هل الشفاطات الايطاليه البا و اليتيرا مشهوره بجودتها ؟

او فيه ماركات المانيه او امريكيه افضل ؟!


رابع شي هل مقاس الشفاط يكون على نفس مقاس سطح الغاز 90 سم. مثلا او عادي يكون اصغر 60 سم ؟ وكم

افضل مقياس لقوته راح يفيدني في هالوضع ؟!

خامس شي ،، موضوع صيانته كيف ح يكون ؟؟ هل اعمل فتحه قريبه من الفتحه الخارجيه او اعملها بجانب اعلى الشفاط

علما انه المسافه تقريبا 2 م من مكان الفرن الى الجدار اللي ح تكون فيه الفتحه الخارجيه !!

وااااسف اذا طولت وكثرت بالاسئله بس الواحد مايبي يسوي اي شي وبعدين يندم ويكسر وحوسه ،،


ولكم كل الشكررررررر ي اخوان وخوات ع اللي تقدمونه لنا في هالمنتدى ،،


اخوكم

طلو

يعطيك العافية حبيبي والله يوفقك ان شاء الله .. مطبخك تقريبا نفس حجم مطبخي .. بحاول اساعدك ببعض المعلومات البسيطة اللي عندي .. ولكن هذا لا يمنع ان تأخذ رأي الخبراء والمتخصصين في هذا المجال .. خصوصا شركة المطابخ وشركة جهاز الشفط .. وبالطبع مقاول البناء الرئيسي .. بحثت في أرشيفي الخاص ولم أجد الا هذه الصورة .. وهي لمطبخي اثناء فترة الاعداد والتأسيس .. اتمنى ان تفي بالغرض ..




http://www.almuhands.org/forum/store...226445_888.jpg

الفرن هنا مقاس 90 .. وهو من نوع (Built in) .. ومثل ما انت شايف معمول فتحة فوق الفرن مباشرة للشفاط .. الذي يجب ان يكون مطابق مقاس الفرن .. التأسيس في السقف مشابه لتاسيس شفاط السقف .. طبعا اترك لك مقاسات الماسورة والارتفاعات وغيرها لتجدها عند الخبراء .. مايهم في هذي المرحلة الجزء المعدني النازل من السقف مثل ماتشوف في الصورة او مايعرف بال (Flexi Pipe) ... والذي يجب ان يكون في منتصف المسافة تماما .. (لاحظ انه مانو بالمنتصف تماما .. ولكن هذا الامر سهل تعديلة جدا في مرحلة الجبس وخاصية الفلاكسي بايب) ..

الوضع المثالي لارتفاع الشفاط ان يبدأ من فوق الفرن بمسافة معينة (سأقيسها لك عندي بالبيت) .. ثم تنتهي تماما عند ارتفاع الخزانة العلوية .. ومع وجود جسر يربط الخزانتين به فتحة يخترقها الشفاط متجها للأغلى ... مرورا بغطاء الجبس الذي ستحتاج عمله على الجدار .. متجها للسقف .. الصورة التالية بعد الانتهاء من كل ماسبق وتركيب ابواب وخزائن المطبخ .. وكل الأجهزة الكهربائية والفرن .. والأهم .... الشفاط .. وهو من ماركة Turbo Air ... ايطالية ...





http://www.almuhands.org/forum/store...226444_273.jpg


طبعا لا تنسى نقطة الكهرباءللشفاط في منتصف المسافة بين الخزانتين خلف الشفاط .. وعلى ارتفاع مناسب .. غطاء الجبس تم عمله قبل تركيب الشفاط وبتمرير الفلكس خلاله ليكون جاهز لتركيب الشفاط .. طبعا ما اوصيك .. غطاء الجبس اصبغه نفس لون الجدار .. عشان يضع معاه .. وليس بلون السقف ..

اعتقد ان اهم ماتحتاج عمله الان الاتفاق مع شركة المطابخ ووضع التصميم النهائي .. ليتسنى لهم وضع علامات كاملة لك في موقع المطبخ على الطبيعة .. نقاط الكهرباء .. اماكن الاجهزة .. الارتفاعات وغيره .. كي تستطيع استكمال اعمال المقاول والجبس والكهرباء ...

انا ركبت شفاط عادي جداري من ماركة Xblair وهي احد الماركات المشهورة .. مادري اصلا اذا كنت تحتاج شفاط اضافي .. خصوصا حسب كلامك ان هذا مطبخ مفتوح .. يعني للاشياء الخفيفة .. افترض عندك مطبخ خارجي للاشياء الثقيلة من قلي وشوي الخ ...

اذا ماتبغي تدخل في هالدوشة والدوخة كلها .. عندك خيار اخر انك تاخذ شفاط فلتر .. بمعنى ان لايحتاج فتحة تصريف للهواء .. فكرة عمله ان مروحته الداخلية تمتص الهواء والروائح الي داخل فلتر داخي .. الذي بدوره يحتاج لصيانة دورية وتغيير من وقت لاخر ... قد يكون هذا الخيار مناسب في حال عدم وجود روائح قوية على اعتبار انه مطبخ داخلي مفتوح ...

اتمنى ان اكون قد افدتك .. وان شاء الله الخبراء يفيدونك اكثر .. والله يوفقك ..

تحياتي

ماشاء الله تبارك الله

الله يجزاك بالخير يابوتيم .. معلومات قيمة

الله يسعدك اخووووي بو تيم ،، مداخله قمة في الروعه والفائده بكل معنى الكلمه ،، :0aa7:


تم. الانتهاء اليوم من التأسيس. للشفاط السقفي من شركة kdk مقاس 38 * 38 وبقوة  370 CFM وهذي. تمت

حسب. مداخله للاخ مدينة الخير في احد المواضيع وتفصيله لقوة الشفاطات المطلوبه لكل مطبخ. فله كل الشكر

والتقديررررر على. المداخله واتمنى اني اكون فهمت معادلاته بالشكل الصحيح وطبقته بالشكل المطلوب :169:


والان شغالين في تأسيس شفاط. الفرن. وسوف يتم عمل فتحه تصريف للهواء في اعلى الجدار بقياس 6 بوصه


و سنقوم بتركيب FLEXI PIPE بطول 6 امتار حتى يكون فيه مجال للتحكم بالمكان المراد يكون فيه بعد الجبس ،،


احب اعرف اذا فيه انواع تنصحون فيها لل FLEXI PIPE. او. مواصفات. معينه او اعتمد نفس اللي تم عمله. لشفاط


السقف واللي هوه من النوع التركي ؟!


نقطة الكهرباء خلف الشفاط هذي كانت غايبه عني تماما ،، سوف نقوم بالتأسيس لها واتوقع انها ح تكون. بارتفاع

1.60م. الى 1.80 م اتوقع كافيه ،، او لكم. نصايح على هالنقطه ؟!


المطبخ مفتوووح و مو تحضيري. بس يعني لكل شي و خايف من موضوع الروايح جدااااا بس عاد مجبور. على


اني اخليه مفتوح لانه اشرح ووسع الشقه بشكل. كبيييييررررر واجمل. صراحة !!


اخر نقطه ذكرتها حيرتني شوي ،، لانه اغلب العاملين في المحلات نصحوا بشفاط يكون بفلتر بس محد ذكر انه

ما يحتاج فتحه لتصريف الهواء !!

وهل لو اشتريت شفاط بفلتر وعملت له تصريف خارجي بيكون افضل او ما راح تفرررق عن بدون تصريف ؟!!



ومرااااا ثانيه احب اشكرك اخوي بو تيم على سرعة ردك والفايده اللي قدمتها لنا. و الله يبارك لك فيما لديك ،، فعلا

صورة مطبخك تنم عن ذوق عالي وفي انتظارك لتفيدنا بالارتفاع المطلوب بين الشفاط والفرن !!


اخوك

طلو

ماشاءالله تبارك الله

يعطيك الف عافية يا ابن بلدي على شرحك الوافي وانا كل ما يحيرني شي افتح منتدانا المميز وتطلع الاجابة على يدك
الحين يبغون يصبغون الجبس وانا شفت طريقة اللي انت عاملها الحين راعي الجبس يسوي الغطاء من الحين وكيف اعرف المسافة الى الحديد الواصل للشفاط والحديد حجمه لازم يطابق حجم الجبس وهل يدخل قليل منه داخل الجبس
سؤال أخير مطبخك شكله من مطابخ البحرين اي لون ماروني لو احمر لأني شفت الماروني وحسيته غامق خصوصا ان الرخام اللي فوقه بيكون اسود

اسألتي وايد لكن عشمي فيك كبير

الأخ طلو تقبل بالغ اعتذاري لتأخري في الرد عليك .. (بيني وبينك نسيت عن الموضوع) .. فاعذرني يا أخي الكريم .. فلك كل التقدير والاحترام .. عموما ..

بخصوص الفليكسي بايب .. ماعندي فكرة اذا في انواع اجود من انواع أخرى .. يمكن صاحب المطابخ يقدر يفيدك .. او مورد الشفاط ايضا .. بس عموما كلهم نفس الشي

بالنسبة لنقطة الكهرب .. انا ارتفاع الشفاط عن الأرض 170 ... يعني النقطة لازم تكون اكبر من 170 ..

بالنسبة للنقطة الأخيرة .. مثل ماذكرت لك .. هناك نوعين .. نوع شفاط فقط .. نوع شفاط + فلتر .. طبعا الشفاط هو عبارة عن المروحة فقط .. مثل اللي عندي .. مافيه فلتر .. هذا بالطبع يحتاج فتحة تصريف

في السوق هناك انواع اخرى .. للاماكن التي ليس بالامكان عمل فيها نقطة تصريف .. هذي تجيك مروحة مع فلتر داخلي .. طبعا المروحة راح تمتص الروائح .. ولكن وين راح توديها طالما ماعندي تصريف ؟ هذي يمتصها الفلتر .. وتختفي الريحة .. وهذا الفلتر بالطبع يحتاج تغيير بشكل دوري ويمكن حتى تنظيف من وقت لوفت ... وبالطبع النوع الأول افضل من ناحية الكفاءة والعملية ..

راح انزل بعد قليل صورة اوضح فيها المقاسات اللي طلبتها مني ...

أم ملاك يعطيك العافية اختي .. وشكرا ع الإطراء الجميل ..

نعم المطبخ من مطابخ البحرين واللون ماروني .. بس الحمدلله طلع جميل جدا ومناسب للمكان .. أتفق معاك ان التوب الاسود ممكن يطلع المكان غامق نوعا ما خصوصا لو كان المكان صغير .. انا عشان جذي ابتعدت عن الاسود .. ومشكلة مطابخ البحرين مايعطيك خيارات كثيرة للتوب ... عموما ..

الشفاط انتي لازم شاريته .. أو على الاقل حاطة عينك على موديل معين .. في هالحالة تطلبين من المحل بروشور او كتالوج الشفاط .. راح تكون فيه جميع المقاسات .. واللي اهما اهم شغلتين .. مساحة الدكت اللي راح يدخل في الجبس (على شكل مربع) .. وطوله .. معظم الشفاطات فيها خاصية ال (Expansion) .. بمعنى انك ممكن تزيدين طوله الى طول معين (يجيك قطعة داخل قطعة) .. فهاي الأمور كلها تكون مشروحة .. أقل طول ممكن واكبر طول ... وهذي القياسات تاخذين لصاحب الجبس عشان يقدر يحسب لك موضوع الغطاء هذا ويضبط لك امورة ..

وطبعا محل المطابخ يجب ان يكون على علم ودراية بجميع الاجهزة اللي راح تخلينها في المطبخ اثناء التصميم وقبل التنفيذ .. عشان التصميم والقياسات تكون دقيقة .. انا اشتريت كل الأجهزة من البداية واعطيت محل المطابخ كل الكتالوجات (صورة طبعا) من جميع القياسات .. وخليته يوقع عليهم :169: .. عشان اي خطا في المستقبل يكون اهو المسئول .. وهو كان على اتصال مع محل الأجهزة ادا كان هناك شك في شغلة معينة يوضحها له ..

والان تابعي معي بعض الصور اللي اتمنى تكون مفيدة للكل ...

هذه صورة بالمقاسات عندي ...

http://www.almuhands.org/forum/store...933600_549.jpg

وهذه صورة الشفاط مخترقا الجناح بين الكبينتين فوق الفرن ...

http://www.almuhands.org/forum/store...933605_247.jpg

وهذه صورة لمايحصل فوق الجناح .. لو تلاحظي مو بالضرورة الشفاط يدخل داخل الجبس .. اذ ان الهدف هو تمرير الفلكس بايب من الشفاط لداخل الجبس .. بس يفترض ان هذا المنظر لايرى من الأسفل (هذه الصورة من فوق) .. يعني في وضع الوقوف الطبيعي من الاسفل يظهر وكان الشفاط يخترق الجبس ..

http://www.almuhands.org/forum/store...933614_220.jpg

اتمنى اكون قد افدتك .. وايضا للاخ طلو ...

تحياتي

تسلم يا بو تيم
ما شاء الله عليك شرحك اكثر من وافي صراحه مفيد جداً
اليوم بالذات قابلت راعي الجبس وقلت له عن البوكس المتصل بالشمني قال لي نعمله لك بعد تركيب الشمني علشان القياس يكون صح
انا افضل يعمله الحين علشان جذي راح أخذ الكاتلوج وأعطيه إياه انشاء الله يضبطه
لك كل الشكر مرة اخرى اخي الكريم