|
مشورتكم بخصوص لون زجاج النوافذ
الأخوات والأخوة.. حياكم الله.. كالعادة، وقعنا العقد مع مصنع الألمنيوم لعمل النوافذ، بعدين جلسنا نفكر بالتفاصيل ؟!! :s23:: كان الاتفاق مع المصنع على عمل الفريمات بلون بيج، مع زجاج عاكس بلون أخضر (Reflective Green USA). لكن لما عملت جولة مع الـ :s25::، إقتنعنا بضرورة تغيير الألوان. أولا، لأن هذه التركيبة جدا شائعة في الفلل والشقق السكنية والمفروشة والشركات.. إلخ. ثانيا، لأن لون الفريم البيج شكله مستهلك ومش حلو مرة. المشكلة اللي لاحظناها هو الفرق الكبير في لون الزجاج الأخضر. فبالرغم من أن كثير من النوافذ لونها أخضر عاكس، لكنها تختلف في المظهر الخارجي. بعضها جميل وبعضها سيء وكأنه مرايه، ولا ندري أيش الضابط في هذي الفروقات (هل هي درجة اللون مثلا أو قوة عكس الشمس؟؟). أرجو منكم المشورة في لون الفريم (الإطار الخارجي) مع لون الزجاج. حنا تقريبا اقتنعنا بلون الفريم الأبيض لأنه يمشي مع جميع ألوان الزجاج، كما أنه متناسق مع لون حجر الرياض الكريم اللي راح نركبه كإطار حول النوافذ. لكن أبغى اقتراحاتكم في اختيار اللون. وألف شكر مقدما.. ملاحظة: قبل ما تقترحون لون برونز للفريم، فكرنا فيه كثير وكان هو الأصل، بعدين غيرنا راينا لأسباب معينة. يعني اللون البرونز غير وارد :s6::! خالد |
هلا بك أخي الكريم
يمكن لو نزلت الصوره للواجهه تكون اوضح للجميع حتى يتسنى لهم المساعده طيب عزيزي ما فكرت في لون الزجاج العسلي حلو و ليس مستهلك بكثره مثل اللون الاخضر والازرق ما ادري يعجبك والا لا ؟؟؟؟؟ |
شكرا يا أختي أم القمر على الرد.. الواجهة مازالت "سوداء" بدون أي تفاصيل إلى الآن. ومقاول الحجر المفروض إنه يبدا خلال اسبوعين بتركيب الحجر على الواجهة. بالتالي ما أظن أن الصورة الحالية راح تفيد كثير. النوافذ كلها مستطيلة 160 × 120 سم. وبصراحة، حنا إلى الآن ما حددنا لون الصبغ الخارجي للواجهة ، وهذا ممكن يعطينا حرية أكثر في اختيار لون الزجاج. العسلي جميل، أما اللون الأزرق فكان اختيار الـ :s25:: وهي تشوفه أجمل من الأخضر خاصة إذا كان الفريم أبيض، لكنها مش متأكده من ذوقها!.. أيش رايك في لون الفريم الأبيض؟ شكرا لك مرة ثانية. خالد |
حياك الله أخ خالد
لون الفريم الأبيض أبداااا ما أشجعك عليه راح يبين فيه اقل وسخ واعتقد تظلم بيتك اذا تحطه لأن لون مستهلك جدا زي ما قلت في الشقق المفروشة وغيره المهم عندك لون الشامبين ( غير البرونز ) رااائع بس اغلى من غيره وكذلك الفضي المطفي لون روعه لكن بالطلب الزجاج شخصيا لاحظت ان الالوان مثل الازرق والاخضر يقيد كثير في الاثاث ويعطي لون اشعة اخضر في النهار او ازرق بشكل مو مريح والازرق يناسب برك السباحة المغلقة والاخضر جميل في المزارع والاستراحات العسلي اهون والاجمل الابيض العاكس يعطي صورة واضحة للخارج خاصة اذا عندك حديقة ولون محااايد ما يقيد ابدا ذكرت ان فيه لون يسمى ( بينك ) بس هو مو وردي لا كأنه عسلي فاااتح على شوي برتقالي على شوي وردي ( وصفه صعب ) ايضا حلو تظل وجهة نظر شخصية والله بوفقك على فكرة خذ قطعة من الحجر معك للمحل افضل |
هلا فيك خالد
انا رأيي من رأي صبا الزجاج الأبيض العاكس افضل خيار والفريم الشامبين مرة حلو وبالتوفيق في اختيارك... |
الأخت صبا والأخت وحي الكلمات.. أنا عاجز عن الشكر على ملاحظاتكم واقتراحاتكم.. اقتنعت أنا والـ :s25:: إن اللون الأبيض مقلب ولا يمكن ننركبه في المنزل للأسباب اللي ذكرتيها. أنا مستغرب من ملاحظتك أن الزجاج الأخضر يعكس لون أخضر على الأثاث الداخلي، ومثله الأزرق؟؟ لأن عندنا مركبينه وما يعطي لون أخضر لكن نوع من الظل (يعني مثل ظل الزجاج البني الفاتح تقريبا) وهذا اللي يخليه يقلل من حدة حرارة الشمس. ممكن اللي تتكلمين عنه هو الزجاج الأخضر الغااااامق اللي طبعا لا يمكن نقرب منه! أما الزجاج الأبيض العاكس :s31::،،،، بصراحة مش مقتنع فيه ، لأن في النهار يبين كأننا قاصين مرايات وملصقينها على الدرايش وهذا شي ما يعجبني بصراحة.. وكمان أحس أنه صار موضه قديمة.. أفكر أركب زجاج أخضر فااااتح و مش عاكس لأني شفته على أحد الفلل وكان شكله جميل ومريح للعين (إن شاء الله راح أصور النافذة وأنزلها هنا). طبعا عيب الزجاج غير العاكس إني راح أضطر أسكر الستاير أو البلاك أوت في أغلب الأوقات. راح أسأل عن البينك اللي ذكرتيه وان شاء الله يكون مناسب.. ولكم تحياتي. خالد |
حسب معرفتي
الأسود العاكس أفضل وأغلى مافي السوق |
أخى خالد.................
اللون الخشبى اللى فيه عروق خشبيه ومطفى اى كأنه خشب ........جميل جدااااا ويتناسب مع الابواب الخارجيه بنفس اللون والزجاج البنى الفاتح العاكس .................... واذا عندك فى الواجهه من حجر الرياض تطعيم بلون مخالف (اغمق) بيكون روووعه وبالتوفيق انشاء الله ...................... فى أختياراتك |
هلا بك أخي الكريم
أسال محلات الزجاج عن الجديد عندهم فيه زجاج مركبينه جيران أهلي اللي هبوا فيه الناس فتره وما أدري يسمى قصدير وشكله مثل القصدير الغالي منه رووووووعه وباين انه غالي والرخيص للاسف يروع كأنه قصدير أنا شخصيا الاجمل عندي العسلي ثم الازرق ثم الاخضر طبعا أهلي مركبين الازرق الغامق وجميل جدا ولا يعكس اي شي على الاثاث او غيره وطبعا تظل مسألة ذوق شخصي بس حاول التنسيق مع لون الحجر أما الفريم الابيض مستهلك والسكري مستهلك والالوان اللي قالوا عنها الاخوات والله ما عندي خبره عنها وأسمح لي حاولت افيدك ولو خبرتي قليله أسال اخي الكريم عن الجديد عندهم وتقدر تنزله هنا وان شاء الله الجميع يساعدك |
على فكره أخي الكريم اللون العسلي اللي اقصده سواء الفاتح منه او الغامق وهذا يرجع لميولك
الشخصي واذا حاب تشوفه فيه مبنى على طريق الملك فهد وانت متجه شمال على طريق سدير القصيم قبل مبنى الجزيره وجريدة الرياض مبنى أعتقد للصحفيين شي زي كذا (اذا جاءك الدفاع المدني على يمينك من عند الاشاره يميين المبنى على يدك اليسار موفق ان شاء الله |
| الساعة الآن 12:50 PM. |
Powered by vBulletin® Copyright ©2000 - 2024, Jelsoft Enterprises Ltd. By : 4as7ab.com